Kultura http://mediapress.al/wp-content/uploads/2020/08/ermonela-jaho.jpg

Ermonela Jaho rrëfen albumin e saj të parë



Ajo ishte 14 vjeç kur do të shikonte operën e parë të saj.

Violeta e “La Traviatas” i ngacmoi Ermonela Jahos emocione të papërshkrueshme, si dhe guximin për të ëndërruar…

“Të paktën një herë në jetë kam për ta kënduar”, mendonte atëherë… Sot numërohen plot 300 herë që ajo i ka dhuruar publikut vendas e atij kombëtar, në skenat më prestigjioze, ato emocione që përjetoi asokohe, madje, edhe më të forta me forcën e saj interpretuese të pazakontë.

Por, kësaj here “La Traviatën” e veçon midis të tjerash për t’ua rrëfyer dashamirësve, si pjesë e albumit të saj të parë që pritet të dalë në 25 shtator të këtij viti.

E ka quajtur “Shpirt i rrallë”, si për të identifikuar të gjitha rolet e personazheve që ajo ka interpretuar me zemër.

Shpirt i rrallë, si sopranoja e njohur italiane Rosina Storchio, pasi muzika, me të cilën ajo interpretoi, shoqëron albumin.

Por, mbi të gjitha, “Shpirt i rrallë”, si Ermonela Jaho, shqiptarja që u jep një shkëlqim ndryshe heroinave të saj me fat tragjik.

Për albumin “Shpirt i rrallë” (“Anima Rara”), Jaho ka punuar edhe gjatë periudhës së izolimit dhe pritet që të dalë krahas formatit fizik, edhe në atë dixhital.

Në të do të përfshihen 14 arie, kryevepra të muzikës klasike.

RRËFIMI I PLOTË I JAHOS PËR “LA TRAVIATAN”

Emocionet që i dha “La traviata”, si opera e parë të cilën mundi të shikojë, i ka krahasuar me ato të dashurisë së parë.

Ka qenë kjo opera shkas që e nxiti Ermonela Jahon të merrte vendimin për t’u bërë pjesë e muzikës klasike, ndonëse në moshë fare të re.

“‘La Traviata’ është shumë e veçantë për mua, pasi ka qenë opera e parë që kam dëgjuar. Madje, ka qenë shkaku pse unë vendosa të bëhesha këngëtare klasike.
Pasi e dëgjova këtë operë për herë të parë, rashë menjëherë në dashuri me shpirtin e Violetës dhe ëndrra ime filloi. Dëshiroja të interpretoja të paktën një herë në jetë rolin e Violetës. Dhe tani e kam jetuar këtë ëndërr përreth treqind herë. Dhe çdo herë, në secilin nga rastet që unë kam veshur fustanin e saj, kam zbuluar shpirtin e saj njerëzor të lidhur me shpirtrat tanë njerëzorë”, shprehet sopranoja Ermonela Jaho përmes një videomesazhi në rrjetet sociale.

“VIOLETA, KAM ZBULUAR VETEN”

Jaho tregon se aria e përzgjedhur prej saj do të jetë “Addio del passato” me Violetën e vetmuar, që në fund të jetës përjeton çaste dhimbjeje, zhgënjimi, dhe atë moment të shkurtër gëzimi, që do ta çojë më të lehtësuar drejt fundit tragjik.

“Është një vepër që më bën të rizbuloj veten, shpirtin tim, dhe kjo përbën një nga arsyet se pse unë dua që aria nga ‘La traviata’ të jetë në albumin tim të parë. Ne vendosëm të këndojmë ‘Addio del passato’, arien nga akti i fundit i veprës, për të sjellë atmosferën e lamtumirës që u jepet ëndrrave, jetës. Violeta është tërësisht e braktisur nga Zoti apo shoqëria dhe njerëzit që ajo do. Unë e lidh gjithmonë këtë pjesë me ndjesinë e të arriturit në atë pikë, sa të humbasësh besimin në çdo gjë që ka pasur rëndësi në jetë. Dhe kjo është kaq e trishtë!”, thotë me tej Jaho.

Fati i personazhit të saj, trishtimi që zgjerohet në dhomën e vetmisë, përbën, sipas Jahos, një moment të brishtë, të cilit shumë njerëz s’i kanë shpëtuar dot.

“Ne të gjithëve na ka ndodhur të gjendemi buzë greminës dhe kjo është shumë e dhimbshme. Është shumë e dhimbshme që të kuptohesh vetëm pasi ke ikur… siç ndodhi me Violetën. Kam zbuluar veten time në këtë arie, sa herë e kam kënduar. Ndërsa jeta merr rrjedhën e vet dhe unë numëroj eksperienca të reja, kjo arie më bën të reflektoj për secilën prej tyre dhe është kjo një prej arsyeve se pse e pëlqej atë kaq shumë”, thotë më tej sopranoja./Panorama

Të fundit

Sony World shpall fotografët e vitit 2021 (FOTO)

Sony World Photography Awards ka shpallur sot fituesit e konkursit për vitin 2021. Çmimet kryesore shkuan për dy fotografë që u munduan të protretizojnë në një formë tjetër kulturën dhe hi

Të pathënat e 22 fotografive më të famshme në histori

Nuk thuhet kot se fotografia vlen sa 1000 fjalë. Fotografitë më poshtë, shpalosin histori të ndryshme, secila prej tyre një histori e vërtetë që la gjurmë të paharrueshme në fusha të ndry

Xhaketa e artë e kostumit të nuses arbëreshe

Një nga karakteristikat më të veçanta dhe të bukura të trashëgimisë kulturore të arbëreshëve të Italisë janë kostumet tradicionale të cilat veçojnë popullsitë shqiptaro-arbëreshe. N

Osmani: Instrumentet e muzikës tonë burimore mbetën pa mjeshtrin e madh, Shaqir Hotin

Presidentja e Kosovës, Vjosa Osmani ka reaguar pas vdekjes së instrumentistit të njohur kosovar Shaqir Hoti duke thënë se kavalli i tij pushoi por tingujt e tij do të jehojnë ndër breza. Osman

Arbëreshët e Kroacisë, historia e shqiptarëve të Zarës

Arbëreshët e Veriut në Kroaci janë me prejardhje shqiptare dhe besim fetar katolik. Paraardhësit e tyre janë shpërngulur nga rajoni i Liqenit të Shkodrës, sot pjesë e Malit të Zi. Në kohë

Kujtimet e Ismail Qemalit nga periudha e rinisë së tij

Gjatë periudhës së sundimin osman në Shqipëri, shoqëria shqiptare karakterizohej nga një kontrast i madh mes fshatarëve dhe çifligarëve. Ju sjellim përshkrimin e L.S. Stavrianos të memorie

Info Tjera